11.01.2017

Հայաստանում առկա չէ բիզնես ազդարարների պաշտպանության համակարգ՝ հիմնված նորարար տեխնոլոգիաների վրա: Ասում է Իրավաբանների հայկական ասոցիացիայի նախագահ Կարեն Զադոյանը:

«Այս խնդիրը փորձելու ենք լուծել «Փաստերի վրա հիմնված բարեփոխումների ջատագովություն» ծրագրի շրջանակներում: Մեր ծրագիրն իր մեջ և՛ նորարարություն է պարունակում` բիզնես ոլորտի խնդիրները հատկորոշելու համար, և՛ ՓՄՁ-ների իրավունքների պաշտպանություն, և՛ Կառավարության հետ երկխոսություն` բիզնես ոլորտի բարեփոխումների իրականացման նպատակով»,- ծրագրի շրջանակներում բիզնես ոլորտի իրավաբանների հետ հանդիպման ժամանակ ասաց Կարեն Զադոյանը:

Նշենք, որ ծրագիրը ֆինանսավորվում է Գերմանիայի միջազգային համագործակցության ընկերության կողմից: Պայմանագիրը կնքվել է Ինֆորմացիոն տեխնոլոգիաների ձեռնարկությունների միության, Իրավաբանների հայկական ասոցիացիայի և Եվրոպական բիզնես ասոցիացիայի հետ համատեղ կոնսորցիումի (Կոնսորցիումի ղեկավարումը իրականացնող գործընկեր Ինֆորմացիոն տեխնոլոգիաների ձեռնարկությունների միություն) հետ:

Երբ կա լավ գաղափար, հեշտ է նաև գտնել գործընկերներ: Հանդիպման ընթացքում նշեց Կարեն Զադոյանը. «Այս ծրագրի հիմնական հաղթաթուղթը հենց բիզնես ոլորտի խնդիրների և կոռուպցիոն ռիսկերի վերաբերյալ տեղեկությունների հավաքագրման նորարական լուծումն է` վեբ հարթակ, որը նաև թույլ կտա ապահովել ՓՄՁ ներկայացուցիչների գաղտնությունը»:

Ինֆորմացիոն տեխնոլոգիաների ձեռնարկությունների միության ծրագրերի ղեկավար Աննա Կարապետյանը հույս ունի, որ ծրագրի արդյունքում բիզնեսի աշխատանքներն արդյունավետ դարձնելու համար խթանիչներ կստեղծվեն, նա անդրադարձավ ինտերնետային հարթակին. «Մենք պետք է ունենանք այդ հարթակը, որտեղ մարդիկ հանգիստ, երբեմն անանուն կերպով կներկայացնեն առկա խնդիրները, դրանք պետք է ստանան շատ արագ լուծումներ, եթե հնարավոր է»,- նշեց նա:

Եվրոպական բիզնես ասոցիացիայի բիզնեսի զարգացման ղեկավար Գարեգին Գալուստովի խոսքերով՝ կազմակերպության կողմից 140 ընկերությունների հետ կատարված հարցումները ցույց են տվել, որ մարդիկ չեն ցանկանում բաց և թափանցիկ արտահայտել իրենց խնդիրները. «Մինչև երկխոսությունը կայանում է, այսինքն՝ մենք կարողանում ենք վստահեցնել հարցվողներին, որ վտանգ չկա, երկար ժամանակ էր տևում: Այդ առումով շատ արդյունավետ է լինելու ծրագիրը, որպեսզի բիզնեսը վեր հանի խնդիրները»,- նշեց բանախոսը:

Մյուս խնդիրը, որ պետք է լուծվի՝ իրազեկվածությունն է, միջազգային փորձագետ Քարլ Ուլբրիխտը նշում է. «Գործի կեսը կլինի նաև, որ այդ մասին մշտապես բարձրաձայնվի, որպեսզի մարդիկ իմանան այդ մասին և օգտվեն հարթակից»:

Այսօր տեղի ունեցավ նաև Իրավաբանների հայկական ասոցիացիայի մարզային գրասենյակների իրավաբանների վերապատրաստում, որոնք ծրագրի շրջանակներում Երևանում, Գյումրիում, Վանաձորում, Գավառում և Կապանում անվճար իրավաբանական խորհրդատվություն կմատուցեն ՓՄՁ-ներին:

 

Սույն ծրագիրն իրականացվում է «Աջակցություն ՓՄՁ զարգացմանը Հայաստանում» ծրագրի շրջանակներում, որը համաֆինանսավորվում է Եվրոպական միության և Գերմանիայի դաշնային հանրապետության տնտեսական համագործակցության և զարգացման նախարարության կողմից: Այն իրականացվում է ԳՄՀԸ «Մասնավոր հատվածի զարգացումը Հարավային Կովկասում» ծրագրի շրջանակում: «Աջակցություն ՓՄՁ զարգացմանը Հայաստանում» ծրագիրը հանդիսանում է Եվրոպական միության «ԵՄ-ն՝ Բիզնեսի համար» և «ԵՄ-ն՝ Նորարարության համար» նախաձեռնությունների մաս:

Բովանդակության համար պատասխանատու է Կոնսորցիումը, և այն կարող է չարտահայտել ԳՄՀԸ, ԵՄ և Գերմանիայի դաշնային հանրապետության տնտեսական համագործակցության և զարգացման նախարարության տեսակետը: